Me mōhio koe ki ō motika hei kiritaki

E hāngai ana te Ture Hokohoko Tōkeke (Fair Trading Act) ki ngā tāngata katoa e tauhokohoko ana, mai i ngā whakahaere nui ki ngā pakihi iti. E hāngai ana te Ture Pūtāhui Kiritaki (Consumer Guarantees Act) ina hokona mai e koe tētahi rawa, ratonga rānei māu ake.

Te Ture Hokohoko Tōkeke

E hāngai ana te Ture Hokohoko Tōkeke ki ngā tāngata katoa e tauhokohoko ana – mai i ngā whakahaere nui pēnei i ngā kamupene hōtēra, ngā kamupene rererangi, me ngā toa hokomaha, tae atu ki ngā pakihi iti, rangitahi rānei pēnei i tētahi tēpu hoko taonga manatunga, tēpu hoko aihikirīmi rānei.

He hara i raro i te Ture ki te whakakotiti i ngā kiritaki, ki te tuku kōrero teka, ki te whakamahi rānei i ngā tikanga hokohoko muremure.

E kapi ana te Ture Hokohoko Tōkeke i ngā:

  • āhuatanga katoa o te hāpai me te hoko atu i ngā rawa me ngā ratonga
  • mea katoa ka kōrerohia mō tētahi rawa, ratonga rānei, ahakoa ā-waha, ā-tuhi rānei
  • whakaaro katoa ka tukuna i ngā pikitia, pānuitanga, rauemi whakatairanga.

Te Ture Pūtāhui Kiritaki

E hāngai ana te Ture Pūtāhui Kiritaki ina hokona mai e koe tētahi rawa, ratonga rānei māu ake.

Kāore e hāngai ana te Ture ki ngā hokohoko tūmataiti.

E pūtāhui ana te Ture ko ngā rawa, ratonga hoki me:

  • pai te kounga
  • tika mō tōna kaupapa
  • ōrite ki tōna whakaahuatanga
  • tae atu i runga i tērā i whakaaehia, mēnā rānei kāore i whakaritea he wā, me tae atu i roto i tētahi wā pai
  • ōrite ki te tauira hua, tauira whakaaturanga rānei
  • hoko atu e tētahi kaihokohoko e whai motika ana ki te hoko
  • whai tautoko mai i ngā pātaka wāhanga whakakapi me ngā pūtahi whakatika (nā te kaiwhakanao).

Ko ngā ratonga me:

  • whakarato kia āta mahi i runga i te whai pūkenga
  • tika mō tōna kaupapa
  • tuku i roto i tētahi wā tika
  • tuku ki tētahi utu tōkeke.

Te utu

He maha ō motika mō ngā utu.

Hei tauira, kei roto koe i tētahi toa pahikara e tirotiro ana ki ngā utu o ngā pahikara maha rerekē. Kei a koe te tika ki te tūmanako:

  • kei te mārama me te tika ngā kerēme utu – tae atu ki ngā utu kua whakaitihia, ngā whakataurite utu me ngā whakahekenga utu
  • kei roto te tāke hokohoko (GST) i te utu, ā, ki te kore e whakaurua, kei te mārama tērā ki a koe
  • ka mārama te kitea o ngā utu tāpiri.

Me pēhea te whakaū i ō motika

Ko te mahi tuatahi māu ina raruraru ana koe me tētahi rawa, ratonga rānei he whakapā atu ki te kaihokohoko i hokona mai e koe. Kāore e taea e te Kōmihana Tauhokohoko te whakaū i te Ture Pūtāhui Kiritaki; me kōkiri te take e koe. Ko tā mātau e taunaki ana mō ngā tautohe pēnei ko te Rōpū Whakawawao Tautohe.

Ka kitea e koe ngā kōrero atu anō mō ō motika i raro i te Ture Pūtāhui Kiritaki i www.consumeraffairs.govt.nz.

Ngā pūtāhui whānui ake

He rerekē te pūtāhui whānui ake ki tētahi pūtāhui aunoa, i te mea ka hokona i tēnei i tua atu i ngā utu o ngā rawa, ratonga hoki. Ko te tikanga ko te pūtāhui aunoa ka tukuna noa ihotia mō te mahinga o tētahi rawa, ratonga rānei mō te kore utu.

Hei tauira, kātahi anō ka hokona mai he pouaka whakaata hou mai i tētahi toa, ā, e taunaki ana te kaihoko kia hokona anō e koe tētahi pūtāhui whānui ake. Me whakarato ēnei e whai ake ki a koe:

  • He tārua ā-tuhi o te whakaaetanga pūtāhui whānui ake i te wā ka hokona mai. Me mārama te reo o te whakaaetanga, ka tuhia te rā me te whakauru i ngā ture katoa me ngā whakaritenga katoa. Kei roto i tēnei ko te wā mōnehutanga me te utu mō tēnei pūtāhui whānui ake.
  • He whakarāpopototanga o ō motika i raro i te Ture Pūtāhui Kiritaki me tētahi whakatauritenga o aua motika me ngā whakamarutanga tāpiri e whakaratohia ana e te pūtāhui whānui ake.
  • He whakarāpopototanga o ō motika ki te whakakore i te whakaaetanga i raro i te Ture Hokohoko Tōkeke.

He pēhea tō whakakore i tētahi whakaaetanga pūtāhui whānui ake:

  • ka taea e koe te whakakore i roto i ngā rā mahi e rima mai i te whiwhitanga o tētahi tārua ā-tuhi o te whakaaetanga
  • ka taea e koe te whakakore i ngā wā katoa mēnā kāore anō kia tutuki i te kaipūtāhui ōna herenga e whakamāramahia ana i runga ake.

E wātea anō he kōrero i tā mātau puka meka Ngā Pūtāhui Whānui Ake.

Ngā hokohoko ā-whare, ā-waea rānei

Ina toro atu tētahi ki a koe i tō kāinga, wāhi mahi, i runga waea rānei ki te hoko rawa atu ki a koe (ā, kāore koe i tonoa i a ia), ka hāngai anō ngā ture hokohoko hāngai poka noa.

Hei tauira, tērā pea kei te kāinga koe e tunu ana i te kai o te ahiahi, ā, ka ohorere te pātōtō i te kuaha, ka waea ohorere ai rānei he tangata. Kei te hoko atu taua tangata i tētahi waea hou, ratonga ipurangi hoki ki a koe.

Kei a koe te tika:

  • kia whakamōhiotia koe i tō motika ki te whakakore ka mutu me pēhea te whakakore
  • ki tētahi whakaaetanga e mau katoa ana ngā kōrero e hiahiatia ana, ki te kore kei a koe te tika ki te whakakore ina hiahia ana koe
  • ki te whakakāhore i te hoko – mēnā kāore i te tino mārama ki a koe he aha te kaihoko e hoko atu ana, kei te pēhia koe rānei, kaua e whakaae atu
  • ki te huri i ō whakaaro me te whakakore i te whakaaetanga ahakoa te take i roto i ngā rā mahi e rima mai i te whiwhi i tētahi tārua ā-tuhi o te whakaaetanga.

Mēnā ka whakatau koe ki te whakakore i te whakaaetanga:

  • me wawe te whakahoki a te kaiwhakarato i ngā moni katoa kua utua e koe
  • me āta manaaki koe i ngā rawa mō ngā rā mahi tekau mai i te rā ka pānuitia te whakakoretanga
  • ina whiwhi koe i ngā moni whakahoki e tika ana ki a koe, me tuku koe i te kaiwhakarato ki te kohi mai i ngā rawa i te wā tika ki a ia
  • ko ngā ratonga ka tukuna e te kaiwhakarato i roto i te wā whakakoretanga rima rā, kei runga anō i a ia – kei a koe tonu te tika ki te whakakore, ā, me te kore utu.

Mō ētahi atu kōrero, tirohia tā mātau puka meka mō Ngā hokohoko ā-whare, ā-waea rānei.

Te hokohoko tuihono

E hāngai ana ngā ture tuihono ki ngā kaihokohoko katoa e pānui ana, e hoko tuihono ana rānei ki ngā kiritaki o Aotearoa, ahakoa kei tāwāhi te kaihokohoko.

Ko tā ngā kaihokohoko e hoko tuihono ana me:

  • mārama mōhio kua uru ki te tauhokohoko
  • mātua whakarite he tika katoa ngā kōrero mō te rawa, ratonga rānei ka mutu kāore i te whakakotiti, tinihanga rānei i ngā kiritaki
  • whaitake ngā kōrero mō ā rātau rawa, ratonga rānei
  • ū ki ngā paerewa haumarutanga hua, kōrero kiritaki hoki ina hāngai ana, ā, kia kaua e hokona ngā rawa e rāhuitia e tētahi pānui mō ngā rawa kore haumaru. Mō ētahi atu kōrero, tirohia tā mātau aratohu mō ngā paerewa haumarutanga rawa
  • whakarite kei te mārama ngā whakaritenga tuku atu me te ū ki ēnei, tae atu ki ngā utu kawe, tāke, utu me ngā wā tae atu.

He aha te tikanga ki a au o te kaihokohoko ‘e tauhokohoko ana’?

Mēnā ka hoko rawa koe mai i tētahi ‘e tauhokohoko ana’, kei te tiakina koe i raro i te Ture Hokohoko Tōkeke me te Ture Pūtāhui Kiritaki. I mua, mēnā ka hoko tuihono ana koe kāore koe e tiakina e te Ture Pūtāhui Kiritaki.

Mō ētahi atu kōrero, tirohia tā mātau puka meka mō Te Hokohoko Tuihono.

He raruraru tāu?

Mēnā he raruraru tāu mō tētahi rawa, ratonga rānei, kei te māharahara rānei koe e whakakotitihia ana koe:

  • me whakarite koe kei te mau i a koe tō rihīti
  • hoki ki te kaihokohoko me te whakamātau ki te whakarite i te raruraru me ia i te tuatahi.

Ki te kore e tutuki tēnei:

Me pūrongo atu ki te Kōmihana Tauhokohoko (Commerce Commission)

Kei a mātau te kawenga mō te whakaū i te Ture Hokohoko Tōkeke. Waea mai ki a mātau i 0800 943 600, whakamahia rānei te puka amuamu tuihono www.comcom.govt.nz/onlinecomplaint-form. He ratonga whakamāori ā-waea tā mātau e wātea ana mā Language Line mēnā ehara te reo Ingarihi i tō reo tuatahi.

Heria te take ki te Rōpū Whakawawao Tautohe (Disputes Tribunal)

Kāore e tino nui te utu, he tikanga ōpaki, matatapu hoki ki te whakarite i te raruraru. Haere ki www.justice.govt.nz/tribunals/disputes-tribunal mō ētahi atu kōrero.

Tīkina he tohutohu

Ka taea e koe te whakapā atu ki te Pokapū Whakahoki Pātai (Citizens Advice Bureau) www.cab.org.nz, ki 0800 367 222, ki tētahi pokapū ture ā-hapori (Community Law Centre) rānei i www.communitylaw.org.nz.